ليه اسعار العربيات هتنزل للنص بعد 3 شهور

img
منوعات 0

ليه اسعار العربيات هتنزل للنص بعد 3 شهور

ملخص كدا مهم جداً و بسيط عن نتائج حملة #خليها_تصدي لغاية دلوقتي في ١٠ نقط ..

١- تقريبا مفيش ولا عربية موديل ٢٠١٩ فى الشارع.

٢- مفيش لا بيع ولا شراء و اللى بيشتروا حاليا على مستوى مصر يتعدوا عالايد الواحدة ولا يمثلوا حتى ٥٪؜ من تارجت البيع لدى الوكلاء.

٣- معارض العربيات بتنش بمعنى الكلمه وكل عروضها الناس مطنشاها.. و ده اللي مجننهم و مخليهم يعملوا تخفيضات بحجة وبدون حجة وصلت ل ٤٠ الف جنية حتي فى العربيات الكوري اللى مش فى الإتفاقية اصلا وبرده مفيش بيع ولا شراء.

٤- الوكلاء يوميا بيدفعوا ارضيات جمارك بالملايين و عندهم مصاريف موظفين وكهرباء وايجارات معارض وقروض بنوك و مئات الالاف من العربيات مركونه في الميناء.

٥- غير المصيبة و الكارثة الأكبر موديلات ٢٠٢٠ هتنزل بعد ٧ شهور وفى نفس الوقت كل موديلات ٢٠١٩ و معظم موديلات ٢٠١٨ لسه متباعوش.. و ده اللي حيخلي الشركة الام برة تسحب التوكيل من من الوكلاء هنا.

٦- مراسلات كتير جدا وصلت للشركات الأم برة عن مكاسب الوكلاء هنا الخيالية وده عامل مشاكل كبيرة لكل الوكلاء.. و حجاجوفيتش لما اتكلم مع شركات عربيات برة المسئولين هناك مش مصدقين المكاسب الخيالية اللي بيحققها الوكلاء في مصر.. واللي بتصل في بعض الاحيان لاكتر من تمن العربية نفسها!

٧- موضوع المقاطعة حاسس بيه الناس البسيطة العادية في الشارع و كمان الإعلام و ده يعتبر نجاح للحملة .. بس الانتصار الحقيقى بإذن الله بعد ٣ شهور او لما تمن العربيات ينزل علي الاقل من ٣٠٪؜ ل٤٠٪؜ ..لأننا اللى عاوزينه لسه متحققش على أرض الواقع و التجار والوكلاء بيلعبوا معانا دلوقتي لعبه النفس الطويل وهما نفسهم فى الحقيقة دلوقتي فى العناية المركزة بس هما بيراهنوا على صبرنا … وغالبا احنا الطرف الفائز.

٨- ربك يمهل ولا يهمل .. احنا شعب بسيط غلبان بنجرى ليل ونهار على لقمه عيشنا وأحلامنا بسيطة .. فمش هنخلى شويه حراميه بإذن الله يسرقونا عينى عينك بمنتهى البجاحه والفحش والجشع..

٩- سؤال للتاجر.. انا كشاب ببدأ حياتي و قررت اشتري عربية بسيطة .. ليه تسرق منى علي الاقل ١٥٠ الف غير ربحك؟ يعنى لو ربنا كارمني جامد اوي ومرتبى ٥ الاف جنيه فى الشهر .. ف انت بتسرق منى علي الاقل ٣ سنين كاملين من عمرى لو مش حصرف ولا مليم في حياتي غير اقساط العربية…

١٠- الخلاصة : الحملة ناجحة بكل المقاييس وسلاحها بسيط اوى و هو الصبر … يارب نصمد كلنا للنهاية.

شير و وعي غيرك.. و اخر نصيحة اوعي حد يشتري عربية دلوقتي.. لغاية ما نشوف و يبان رد فعل الوكلاء و التجار لان فرق الفلوس انت اولي بيه او ولادك.

#خليها_تصدي_زيرو_جمارك
#خليها_تصدي_لحد_ما_ترخص

المصدر Ahmed Haggagovic – أحمد حجاجوفيتش
صوت وطني

مواضيع متعلقة

التعليقات مغلقة