قصيده أنا المواطن للشاعر محمد ابو العبادى

img
طريق الإبداع 0

قصيده أنا المواطن للشاعر محمد ابو العبادى

أنا المواطن

أنا المربوط ف طوّاله

وانا التور اللي ف الساقيه

أنا الإيد اللي شغاله وطول العمر مش لاقيه

أنا الهدمه اللي مقطوعه وانا البرد اللي ف الجتّه

أنا الضحكه اللي موجوعه ومتقطّع متين حتّه أنا الدنيا اللي مختلفه

وانا نظرة عيون خايفه وصبحت فجأه مش شايفه وكانت سته على سته

ف أيه معنى الحياه ليّا وانا ميّت سنين م الجوع مع إني ف سفرتكم باكون القصعه والفتّه

أنا المدهوس ف كل مكان كأني تراب على الأسفلت

وانا المحبوس ورا القضبان بألف سؤال ماليهم رد

وانا الجاني ومجني عليه وانا المربوط ف رجل البيه

وانا الضل اللي يمشي عليه وياخد خطوته ويمد أنا المرمي ف كل مكان

وانا الأوضه بدون جدران وانا السقف اللي كله إيمان وساجد من زمان ع الأرض

أنا وقت الهزيمه هموم وانا النصر اللي جيبته ف يوم وانا العايش سنين محروم عدد أيام .. ماليهم عد.

أنا وقت الصيام نخله بترميلكوا الرُطب ألوان وانا العايش كما النحله وطول اليوم ف ألف ميدان

أنا الزارع غيطان قوتكم وانا الباني حيطان بيتكم وانا الناسج لكسوتكم واغطّيكم وابات بردان !

أنا السهران حرس ع الباب وانا المحني ف عز شباب

وانا الصدق ف طريق كدّاب ومش عارف طريق عنوان

أنا المطحون سنين بينكم وانا المقتول وبادعيلكم وانا الضحكه اللي ف عيونكم وشايل .. ميت جبل أحزان

أنا المجموع على الأوجاع ما شيلتوش م الوجع حبّه

أنا المطروح من الأسماع عشان صوتي ماهوش كدبه وانا المضروب بميت كرباج وميّت من يادوب ضربه

وانا المقسوم ف كل مكان ودايما خارج الحسبه طبيعي أكون على الهامش مواطن .. واتعمل لعبه

محمد ابو العبادى

صوت وطني

صفحتنا عل الفيس يوك 

مواضيع متعلقة

التعليقات مغلقة