عادات خاطئة فى الصيام والإفطار

img
منوعات 0

عادات خاطئة فى الصيام والإفطار:
ما نشربش مياه ونشرب ٢ لتر مياه قبل السحور. والصيام
نشرب مياه بشكل متواصل منذ أذان المغرب وحتى السحور وخلى دايماً زجاجة مياه فى إيدك واشرب على قد ما تقدر. قبل الصيام
شرب المياه الكتير قبل السحور ملوش قيمة فى إرواء الجسم لأن شرب مياه كتير مرة واخدة بيسبب حاجة اسمها إدرار بول وهاندخل الحمام ننزل اللى شربناه ونلطم ونقول شقا عمرى ضاع ?.
من علامات ارتواء الجسم هو لون البول.. كل ما يكةن اللون فاتح طول فترة الصيام معناها أن الجسم فيه مياه كويسة.

نفطر حاجة خشاف??، تمر، بلح وهوب ندخل على الأكل.

الصح نفطر خشاف تمر بلح وشوية سوائل بسيطة??.. ونتوقف STOP.
روح صلى وطول فى الصلاة كل ما تطول فى الصلاة ربنا هايغفرلك ومعدتك هاتغفرلك ? .
المعدة بتحتاج وقت عشان تشتغل ١٥ ل ٣٠ دقيقة لذلك بنبدأ معاها تدريجيا.
الوقت ده بيدى فرصة للإنسولين يطلع تدريجيا عشان يحرق الأكل.
لما بندبها علاطول المعدة بتتفاجىء بالأكل هايحصل ايه؟
السكر هايعلى مرة واحدة نتيجة الهضم فالانسولين ينزل زى المدب بسرعة يوقع السكر فى الجسم.. لذلك اللى بياكل كتير بدون فاصل بيحس بتعب ونوم وتقل وده من أعراض انخفاض السكر نتيجة إفراز الإنسولين بسرعة.

من عاداتنا طبق السلطة فى الإفطار فقط.
طبق السلطة اقسمه نصين نص للإفطار ونص للسحور أو كل طبق سلطة تانى فى السحور.. بخلاف الفائدة ده أكبر مصدر للألياف وتنظيم حركة الأمعاء طول اليوم.

الحلويات الكتير.
ماتحرمش نفسك .. لكن ما تهلكش نفسك.. موسم رمضان للأسف أغلب الناس صحتهم بتسوء والدهون بتزيد بسبب الإفراط فى الحلويات وبدل ما نصوم عشان نصِح بقينا نصوم عشان نمرض. بالراحة على الكنافة والقطايف الله يباركلكم ?

نروح نتسحر برة مع بعض الساعة ١٢ بالليل.
السحور أفضل موعد له قبل الفجر علاطول أخر السحور قدر الإمكان عشان غرضنا نخلى الأكل فى المعدة أطول فترة ممكنة.

الحمد لله المغرب أذن هات سيجارة.
أسوأ شىء فى التاريخ هو الإفطار على السيجارة امتصاص السم القاتل ده بيزيد مئات الأضعاف.
حاول تستغل رمضان فى الإقلاع عن التدخين.

الله على الطرشى مع الفول فى السحور?
المخللات دى هاتعطشك وتصخى تقول أحدٌ أحد الصبح.
ممنوع أكل الموالح منعاً باتا فى السحور.

حاول ما تزودش فى الأكل أثناء الإفطار وبعد الإفطار وتاكل بانتقام بأثر رجعى ? بانتقام وحاول أنك تطلع من رمضان خاسس وزن .

لما تحس بالشبع وقف أكل علاطول .. لأن حاسة الشبع بتحصل لما المعدة بتدى إشارة للمخ إنها امتلأت الامتلاء المثالى للهضم.. الإشارة بتروح للمخ لمكان اسمه المهاد وبتدينا إحساس بالشبع لجل ما نفهم ونبطل أكل ?.
مش عايزين نبوظ النظام الإلكترونى ده ربنا يباركلكم ?

أفضل سحور هو السحور الأصيل بتاعنا المكون من طبق فول محوج كده بالليمون – زبادى – عيش – بيض مفيش مشكلة.
زود طبق سلطة كبير عشان أحبك .
ماتاكلش مخلل عشان أحبك
ماتاكلش طعمية عشان أحبك (زيت عربيات بيعطش)
نشرب كوباية شاى جميلة وننام لحد الفطار إن شاء الله

 

صوت وطني 

مواضيع متعلقة

التعليقات مغلقة