شهقة وطن للشاعر محمد ابو العبادى

img
طريق الإبداع 0

شهقة وطن للشاعر محمد ابو العبادى

حبّة أكفان ………..

1 ماشيين بنلملم أشلاءنا من فوق رصفان

أسفلت الشارع بات شبعان وما زلنا ف دنيا الغاب عايشين والغابه بتيجي على الغلبان

عصافير نايمين فوق الأشجار تحت الأشجار مليون تعبان حتى الأشجار مافيهاش أوراق ولا فيها فروع ياتموت بردان

ياتموت م الجوع ياتعيش مصلوب كما شكل يسوع ويهوذا ف كل مكان دفيان

ماشيين بنلملم أشلاءنا أنما تايهين علشان بندوّر مش لاقيين حبّة أكفان

2 وقت الربيع الورد شايفه بيرتجف والعطر أصبح مختلف عن كل عام

ريحة العطن زادت كتير عملت مع الحاله انسجام هرب الفراش من مطرحه واتلم ع الورد الهوام

الطير صبح غربان وبوم دايسين على رقاب الحمام وقت الربيع هجم الخريف ف وقفنا صفّين ع الرصيف صف انتباه والتاني يضربله السلام

دخل الحكيم الصومعه خرج اللئيم مسك اللجام وقف السفيه أَم الصلاه وف أخر الصف الإمام

3 الخوف الخارج م القمقم كما موج البحر علينا اتمد والمعبد كان من غير عمدان مع أول موج تسونامي اتهد

أحنا اللي زرعنا الخوف واحنا اللي كتبناه ف المنهج فرض من يوم حطّين واحنا الحَاطين دماغتنا ف قلب تراب الأرض الهزل

اتحكّم ف عقولنا ما بقاش جوّانا مكان للجد الخوف الخارج م القمقم خلانا اخوات ماشيين ف الضد لو مد الأخ الإيد بسلام

بيقابله أخوه بجبال الصد ونمد الإيد للغرب عشان نتعلّم نبني ما بنّا السد والماضي اللي انهار على إيدنا

محتاج ناس غيرنا عشان يترد ف بلاش نتكلم عن بطولات بطولاتنا خلاص .. مولد وانفض …………

محمد ابو العبادى من ديوانى شهقة وطن

صوت وطني 

مواضيع متعلقة

التعليقات مغلقة